အရှက်တရားနဲ့ အကြောက်တရား ဆိုတဲ့ ခံစားမှုမျိုးတွေကို လူရယ်လိုဖြစ်လာပြီး ကတည်းက လူလိုခံစားနားလည်တတ်တဲ့သူတိုင်း ခံစားကြရဘူုးတာဟာ ဓမ္မတာပဲဖြစ်ပါတယ်။ ရှက်ခြင်း၊ ကြောက်ခြင်း စတဲ့ စိတ်ခံစားမှုများအပြင် ၊ အခြားခြားသော စိတ်ခံစားမှု များစွာကို လဲ ကျွန်တော်တို့အနေနဲ့ နေ့စဉ်နဲ့အမျှ ကြုံတွေ့ ခံစားရလေ့ရှိစမြဲပါ။ အဲဒီ့ အရှက်၊ အကြောက်တွေကို ခံစားနားလည်ပြီးတော့ လူသားတစ်ယောက်လို ကျင့်ကြံပြုမူ လက်ခံနိုင်ဘို့ရာအတွက် Introspection လို့ခေါ်တဲ့ မိမိကိုယ်မိမိဆန်းစစ်မှု အသိဥာဏ် ကို မှန်ကန်စွာနဲ့ မြင့်မားစွာ ရရှိပိုင်ဆိုင်ထားဘို့ လိုအပ်ပြန်ပါတယ်။ မိမိကိုယ်မိမိ ဆန်းစစ်နိုင်တဲ့ အသိပညာဟာ ငြင်းချက်ထုတ်စရာ မလိုလောက်အောင်ကို လိုအပ်တဲ့ အရာတစ်ခုဖြစ်ပြီးတော့ ဘယ်တော့မှလဲ ဆုံးခန်းတိုင်အောင် ပြည့်စုံစွာ သိရှိသွားတယ်ဆိုတာ မရှိပါဘူး။
တစ်ချို့သော သူများအတွက် အရှက်တရားဆိုတာမျိုးဟာ မိမိဘ၀ကိုယ်မိမိ ဆုံးခန်းတိုင်အောင်၊ သေကြောင်းကြံစည်မှုပြုသည် အထိ ကြီးမားမှုရှိကြတာကို တွေ့နိုင်ပါတယ်။ ဒါမျိုးကိစ္စရပ်တွေဟာ အပြင်ပန်း က နေကြည့်နေသူတစ်ဦး တစ်ယောက်အနေကတော့ နားလည်ပေးဘို့ရာ အလွန်ခက်ခဲလေ့ရှိတာကို တွေ့ရပါတယ်။ မရှက်တတ်သူ၊ မရှက်ဘူးသူတစ်ယောက်အနေနဲ့ အရှက်ကြီးလွန်းလို့ မိမိကိုယ်မိမိ သတ်သေသွားသူတစ်ယောက်ကို ရုပ်ဝါဒ တစ်ခုအပေါ်တင်မှာပဲ အခြေခံပြီးတော့ ပိုက်ဆံမရှိလို့၊ ဆင်းရဲလို့၊ ကျပ်တည်းမှုဒဏ်ကို မခံနိုင်လို့ မိမိကိုယ်ကို သေကြောင်းကြံသွားတယ်လို့ ပဲ ကောက်ချက်ချကြမှာ ဖြစ်ပါတယ်။ ဒါပေမဲ့ ရှက်တတ်သူတစ်ယောက်ခံစားသွားရတဲ့ နာကျင်မှုတွေ၊ မိမိကိုယ်မိမိတန်ဘိုးမရှိတော့ဘူး လို့ခံစားရတာတွေကိုတော့ မရှက်ဘူးသူတွေဟာ နားလည်နိုင်ကြမှာ မဟုတ်ပါဘူး။
ရှက်ခြင်း၊ ကြောက်ခြင်း အစရှိတဲ့ ခံစားမှုတွေကို လုံးဝမခံစားဘူးသူတွေ ဒီကမ္ဘာပေါ်မှာ အများကြီးရှိတယ်လို့ လူမှုရေးသိပ္ပံပညာရှင်တွေဆိုကြ ပါတယ်။ နှစ်ပေါင်းများစွာကြာအောင် ရှက်ခြင်း ကြောက်ခြင်းအစရှိတဲ့ စိတ်ခံစားမှုတွေနဲ့ ကင်းမဲ့ခဲ့ရတဲ့သူတွေဟာ လဲ ဒီလိုမျိုး ရှက်တယ်၊ ကြောက်တယ်ဆိုတာ ဘယ်လိုခံစားမှုမျိုးလဲဆိုတာကို မေ့လျော့သွားတတ်ကြတယ်လို့ဆိုပါတယ်။ ဒါပေမဲ့ ဒါမျိုးလူတွေဆီမှာ ရှက်စိတ်၊ ကြောက်စိတ် လုံးဝကင်းမဲ့နေတာတော့ မဟုတ်ပါဘူး။ Character လို့ခေါ်တဲ့ လူတစ်ဦးတစ်ယောက် (သို့) အရာဝတ္တု တစ်ခုခုရဲ့ စရိုက်လက္ခဏာတွေကို ပုံစံသွင်း ပြုပြင်ခံခဲ့ရတဲ့ သူတွေဆီမှာ Pridefulness လို့ခေါ်တဲ့ မိမိကိုယ်မိမိ အထင်ကြီးခြင်းနဲ့ ၊ Contempt လို့ခေါ်တဲ့ တစ်ပါးသူကို အထင်သေးခြင်း Character တွေ အားကောင်းလာတဲ့အချိန်မှာ Shame နဲ့ Fear လို့ခေါ်တဲ့ ရှက်ခြင်း၊ ကြောက်ခြင်း စရိုက်တွေယုတ်လျော့လာရ ခြင်းပဲဖြစ်ပါတယ်။ စိတ်ခံစားမှု အရမ်းပြင်းထန်လာပြီဆိုရင်လဲ Cognitive Analysis လို့ခေါ်တဲ့ စိတ်ခံစားမှုကို ဘေးဖယ်ထုတ်ထားပြီးတော့ စဉ်းစားချင့်ချိန်မှုမျိုးကို ပြုလုပ်နိုင်တဲ့ အသိဥာဏ်ဟာ အလုပ်မလုပ်နိုင်တော့ လောက်အောင် ဖြစ်တတ်ပါတယ်။ ဒီလိုအခါမျိုးမှာလဲ အရှက်တရားနဲ့ အကြောက်တရား ကင်းကွာသွားတတ်ပါတယ်။ အဲဒါမျိုးအရှက်တရား ၊ အကြောက်တရား ကင်းမဲ့တဲ့သူတွေရှိနေပေမဲ့ လောကကြီးမှာ ရှက်ရမဲ့ အရာ အပြုအမူတွေ၊ တစ်ကယ့်ကို ကြောက်စရာကောင်းတဲ့ အရာတွေ ၊ အပြုအမူ တစ်စုံတစ်ခုကို ပြုလုပ်လိုက်တဲ့အတွက် ကြောက်လန့်စရာကောင်းတာတွေ ဖြစ်ပျက်လာနိုင်တဲ့ အချက်တွေဟာ ကင်းမဲ့နေတာမဟုတ်ပါဘူး။ လောကကြီးမှာ ကြောက်စရာ တစ်စုံတစ်ခုကို ကြောက်စရာကောင်းမှန်းမသိပဲ ပြုလုပ်နေသူတွေ၊ ရှက်စရာအပြုအမူတွေကို ရှက်စရာကောင်းမှန်းမသိပဲ၊ ဒါမှမဟုတ် သိသိကြီးနဲ့ပဲ ပြုမူကျင့်ကြံနေသူတွေဟာ ဒုနဲ့ဒေးရှိနေဆဲပါ။
လူတစ်ဦးတစ်ယောက်ဟာ မိမိကိုယ်မိမိဝေဖန်ဆန်းစစ်တော့မယ်ဆိုရင် အကန့်အသတ်တွေအများကြီးကို တွေ့ကြုံလာရတတ်ပါတယ်။ ဆိုလိုချင်တာက မိမိကိုယ်မိမိဆန်းစစ်မှုဟာ ကန့်သတ်ခံထားရတဲ့ ဘောင်တစ်ခုအတွင်းမှာပဲ ရှိနေတတ်တာပါပဲ။ ဥပမာအားဖြင့် အကြောင်းအရာတစ်ခုကို ဘယ်လောက်သိသလဲ ကိုယ့်ကိုကိုယ်ဆန်းစစ်ကြည့်ကြေးဆိုရင် ကိုယ်ကျင်လည်နေရတဲ့ ဘောင်ကျဉ်းကျဉ်းကလေးမှာပဲ ပြန်ကြည့်လိုက်ပြီးတော့ ကိုယ့်ကိုကိုယ် ဆုံးဖြတ်ချက်ချလိုက်တာမျိုး ဒါမှမဟုတ် ဆုံးဖြတ်ချက်တစ်ခုခုကို ချလိုက်တာမျိုး ပြုလုပ်တတ်ကြပါတယ်။ ဒါမျိုးအခြေအနေတွေကို ကျော်လွှားနိုင်ဘို့ရာအတွက် နည်းလမ်းတွေရှိပါတယ်၊ ဒါပေမဲ့ဒီနည်းလမ်းတွေဟာလဲ အခုနကကျွန်တော်တို့ ဆိုခဲ့တဲ့ ကန့်သတ်မှု ဘောင်တွေရဲ့ နယ်ပယ်ကို ချဲ့ထွင်ဘို့ရာ အတိုင်းအတာတစ်ခုအထိပဲ တတ်နိုင်ပါတယ်။ အဲဒီ့နည်းလမ်းကတော့ မိမိကိုယ်မိမိ သုံးသပ်ဆန်းစစ်တော့မယ်ဆိုရင်၊ အကြောင်းအရာတစ်စုံတစ်ခုကို သုံးသပ်ဆန်းစစ်တော့ မယ်ဆိုရင် ထိန်းချုပ်မှုတစ်ခုခုကနေကင်းဝေးနေတဲ့ နေ့စဉ်ကြုံတွေ့နေရတဲ့ လူတွေရဲ့ အပြုအမူတွေကို လေ့လာခြင်းပဲဖြစ်ပါတယ်။ အဲဒီလိုမျိုး လေ့လာမှုတွေကနေရရှိလာတဲ့ အသိဥာဏ်တွေဟာလဲ အကန့်အသတ်ရှိတယ်ဆိုတာကိုတော့ ကျွန်တော်တို့ မေ့ထားလို့မရနိုင်ပါဘူး။
ကောင်းပါပြီ အထက်ကကျွန်တော်တို့ ရှည်ရှည်ဝေးဝေးပြောနေခဲ့တဲ့ အကြောင်းအရာတွေရဲ့ အဓိက ရည်ရွယ်ချက်ကို အခုမှပဲ စပြီးတော့ ရှင်းနိုင်ပါ့မယ်။ ရှက်ခြင်း၊ ကြောက်ခြင်း အစရှိတဲ့ အကြောင်းကို ပြောနေတာတွေ ၊ မိမိကိုယ်မိမိ ဆန်းစစ်ခြင်းအစရှိတာတွေကို ရှည်ရှည်ဝေးဝေးပြောနေတာတွေဟာ တစ်ခြား ကြောင့်တော့ မဟုတ်ပါဘူး။ ပြီးခဲ့တဲ့ စက်တင်ဘာလတုန်းက သံဃာတွေကို ရက်ရက်စက်စက်ရိုက်နှက် သတ်ဖြတ်ခဲ့တဲ့ အုပ်စုဝင် လူ့အနွတ်တတွေဟာ သံဃာတော်တွေကို စော်ကားမှု ကံကို မိုက်ရိုင်းစွာ နောက်ထပ်တစ်ဖန် ကျူး လွန်မှုပြုလာကြပြန်တာကို တွေ့ရပါတယ်။ ဒါမျိုးကောင်တွေ ကိုယ့်ကိုကိုယ် စဉ်းစား ဆန်းစစ်မှု ပြုနိုင်ဘို့ရာ၊ အရှက်တရား၊ အကြောက်တရားဆိုတာ ဒါမျိုးကောင်တွေဆီမှာ ကင်းမဲ့နေပေမဲ့ တစ်ကယ်ကိုကြောက်စရာကောင်းတဲ့အရာတွေဟာ ကမ္ဘာပေါ်မှာ ရှိနေသေးတယ်၊ ဒါမျိုးကြောက်စရာကောင်း တာတွေကို တစ်ချိန်ချိန်မှာ ကြုံတွေ့လာရနိုင်တယ်ဆိုတာကို သတိပေးဘို့ရာ ရေးသားရလိုက်ရခြင်းပဲ ဖြစ်ပါတယ်။ မိမိကိုယ်မိမိမကြောက်တတ်ဘူး ထင်နေသူများသိစေဘို့ရာ လူတွေဆီမှာ ဖြစ်ပေါ်လေ့ရှိတဲ့ စိတ်ခံစားမှုအချို့နဲ့ကို ဖော်ပြပေးလိုက်ပါတယ်။
အရှက်တရား - စစ်ခွေးတွေမှာ မရှိပါ။
မထီလေးစားပြုလိုမှု - စစ်ခွေးများထံတွင် အပြည့်ရှိသည်။
အပြစ်ရှိသည်ဟုခံစားရခြင်း - စစ်ခွေးများထံတွင်မရှိပါ။
ဒေါသ - စစ်ခွေးများ မထွက်ဘူးသေးပါ။ ထိုဒေါသထွက်သည့်နေ့သည် သေရန်နီးလာသည့်နေ့ဖြစ်ရမည်။
မိမိကိုယ်မိမိအထင်ကြီးခြင်း - စစ်ခွေးများ ထံတွင်ရှိနေကြသည်။ (ကောင်းပါသည်၊ ရန်သူအားအထင်သေးခြင်း သည် ကိုယ့်သေတွင်းကို တူးခြင်းဖြစ်သည်)
မာန - စစ်ခွေးများခေါင်ခိုက်နေကြသည်။
လေးစားမှု - စစ်ခွေးများထံတွင် နည်းပါးသည်။
အားကျခြင်း - စစ်ခွေးများ တိတ်တိတ်ကလေးသာ အားကျရပါသည်။
မတရားမှုကို ဒေါသထွက်ခြင်း (Indignation) - စစ်ခွေးများကြောင့် ကျွန်တော်တို့ ဒေါသ ဖြစ်ရပါသည်။
စာနာထောက်ထားခြင်း - စစ်ခွေးများထံတွင် လုံးဝမရှိပါ။
ဂရုဏာဖြစ်ခြင်း - စစ်ခွေးများထံတွင် မရှိပါ။
သူတစ်ပါးအား ပျက်စီးလိုသည့် ဆန္ဒ၊ ယုတ်မာသည့်စိတ်ထား (Malice) - စစ်ခွေးများ လွန်ကဲစွာရှိကြသည်။
လောဘစိတ်၊ မလိုမုန်းထားစိတ် (Gloating) - စိတ်ခွေးများထံတွင် အပြည့်ရှိသည်။
အထက်ပါစိတ်ခံစားမှုတွေအပြင်၊ ချစ်ခြင်း၊ မုန်းခြင်း ၊ ကြောက်လန့်ခြင်းနဲ့၊ မနာလိုခြင်း အစရှိတဲ့ စိတ်ခံစားမှုမျိုးတွေလဲ များစွာရှိပါသေးတယ်။ စိတ်ပညာရှင်များရဲ့ လေ့လာမှု အရ အထက်ပါစိတ်ခံစားရမှု တွေပေါ်ပေါက်လာရခြင်းဟာ မိမိကိုယ်တိုင်ရဲ့ အကျင့်စရိုက်၊ ပြုမူလုပ်ကိုင်ခဲ့တဲ့အချက်တွေ၊ တစ်ပါးသူတစ်ဦး တစ်ယောက်ရဲ့ အကျင့်စရိုက်၊ ပြုမူလုပ်ကိုင်မှုတွေအပေါ်မှာ မူတည်ပြီးတော့ ပေါ်ပေါက်လာရတယ်လို့ ဆိုကြပါတယ်။ နောက်ပြီးတော့ စိတ်ခံစားရမှုအားလုံးဟာ အစုအဖွဲ့ တစ်ခုအတွင်းမှာသာ တည်ရှိနေတာမဟုတ်ပဲ နဲ့ အစုအဖွဲ့ကလေးတွေနဲ့ သီးခြားစီတည်ရှိနေကြတယ်ဆိုတာကို စိတ်ပညာရှင်တွေလေ့လာတွေ့ရှိခဲ့ရပါတယ်။
ဥပမာအားဖြင့်ပြောပြရရင် မိမိကိုယ်မိမိအထင်ကြီးခြင်း၊ မာန၊ အပြစ်ရှိတယ်လို့ခံစားရမှုတွေ၊ ရှက်ကြောက်ခြင်း တရားတွေဟာ မိမိရဲ့ကိုယ်ပိုင် အကျင့်စရိုက်အပြုအမူပေါ်မှာပဲ မူတည်နေပြီးတော့ ၊ မည်သူတစ်ဦး တစ်ယောက်ကမျှ လာရောက်ပြောဆို လို့ ပေါ်ပေါက်လာခြင်းမရှိဘူးဆိုတာပါပဲ။ ဆိုလိုချင်တာကတော့ မရှက်တတ်သူတစ်ယောက်ကို ဒီအရာဟာ ရှက်စရာကောင်းတဲ့အရာပါလို့ ဘေးကနေလူတစ်ယောက်က ဘယ်လောက်ပဲ ပြောပြနေနေ အဲဒီ့မရှက်တတ်သူက မိမိကိုယ်မိမိ ဝေဖန်ဆန်းစစ်မှု မပြုလုပ်ဘူးဆိုရင် အဲဒီ့လူဟာ အရှက်မဲ့တဲ့လုပ်ရပ်ကို ထပ်ကာတစ်လဲလဲ လုပ်နေဦးမှာပါပဲလို့ ဆိုတာပါ။
ကောင်းပါပြီ၊ အရမ်းရှည်ရှည်ဝေးဝေးပြောမနေတော့ပါဘူး။ မြန်မာနိုင်ငံရဲ့ လူ့အဖွဲ့အစည်း တစ်ခုလုံးကသာ မက ကမ္ဘာ့လူ့ အဖွဲ့အစည်း ကပါ ရိုသေလေးစားစွာ ပြောဆိုဆက်ဆံကြတဲ့ သံဃာတော်များကို စော်ကား နေကြတဲ့ အရှက် အကြောက်မရှိသူတစ်စုကို ဒီတစ်ခုပြောပါရစေ။ ကိုယ့်ကိုကိုယ်ဘာကောင်လဲဆိုတာ၊ ကိုယ်ဘာတွေလုပ်နေသလဲဆိုတာကို နဲနဲလောက်ပြန်ဆန်းစစ်ကြည့်ကြစမ်းပါ။ မင်းတို့လိုကောင်တွေဆီမှာ အရှက်တရား၊ အကြောက်တရားရှိသလားဆိုတာ ပြန်ဆန်းစစ်ကြည့်ကြစမ်းပါ။ ဆန်းစစ်တဲ့နေရာမှာ ကိုယ်ကျင်လည်နေတဲ့ အသိုင်းအ၀န်းသေးသေးကလေးထဲက ဘောင်တွေကို ဖယ်နိုင်အောင် ကြိုးစားလိုက်ကြပါဦး။ ရုရှားဟာ ကမ္ဘာကြီးမဟုတ်သလို၊ ရုရှားဟာ Frist World လို့ခေါ်တဲ့ နိုင်ငံတွေထဲကိုတောင်ကိုမှ ၀င်နိုင်စွမ်းမရှိပါသေးပါဘူး။ မြန်မာနိုင်ငံရဲ့စစ်ခွေးခြံဟာ ကမ္ဘာကြီးမဟုတ်သလို၊ အဲဒီ့ စစ်ခွေးခြံပေါက်တွေဟာလဲ လက်နက်မဲ့ ပြည်သူတွေကို ဒုက္ခပေးနိုင်ယုံကလွဲပြီးတော့ တစ်ခြား ဘယ်နိုင်ငံရဲ့ စစ်တပ်ကိုမှ ယှဉ်နိုင်စွမ်းမရှိဘူးဆိုတာ သဘောပေါက်လိုက်ကြစမ်းပါ။ ပခုံးပေါ်မှာတင်ထားတဲ့ အပွင့်ဆိုတာလဲ ၄တန်းတောင်မအောင်တဲ့ မြန်မာနိုင်ငံကလူတွေကိုပဲ ကြောက်ရွံ့မှုကိုပေးနိုင်စွမ်း၊ လူပေါ်လူဇော်လုပ်နိုင်စွမ်းပဲ ရှိတယ်ဆိုတာ မြင်နိုင်အောင် ကြိုးစားလိုက်ကြပါဦး။ ရှက်တတ်ရင် သံဃာတော်တွေကို အခုပြောဆိုနေကြတာတွေကို ရပ်ပစ်လိုက်ဘို့ကောင်းနေပါပြီ ခင်ဗျား။ နာကျင်ခံခက် ဒေသထွက်ကြရတဲ့ ပြည်သူတွေကို တစ်ခုပြောချင်ပါတယ်။ ဒါမျိုးကောင်တွေကို ဒူးထောက်ပြီးတော့ အမလေး အဘလေး အော်အောင် လုပ်ဘို့ရာ လွယ်လွယ်လေးဆိုတာ ကျွန်တော်တို့ ရဲရဲကြီးပြောရဲပါတယ်။ အရှက်မရှိတဲ့သူတွေကို တစ်ချိန်ချိန်မှာ ပညာပေးနိုင်ဘို့ ကျွန်တော်တို့ ကြိုးစားလိုက်ကြရအောင်လား ခင်ဗျာ။
No comments:
Post a Comment